塊鏡照我唔到（上）
早上起身，睡眼惺忪，化妝返工，一個重覆咗幾百次嘅流程。
但今朝，我拎起粉撲，望向梳妝鏡，居然見唔到我自己！
鏡裡面咩都有，有我張櫈、有幅牆，只係冇我。
我嚇到成個人醒晒，撲去廁所，廁所塊鏡都係照唔到我。
鬼先會照唔到鏡，唔通我已經死咗，而我唔知？
我好慌張咁打畀男友阿邦，阿邦問：「BB？你今日唔駛返工咩？」
佢語氣平靜，唔似收到我嘅死訊。
收咗線之後，我都係覺得唔穩陣，我迅速換好衫，落樓返工。
樓下嘅保安同我打招呼，去到公司，同事同我打招呼，一切如常，睇嚟我冇死到。
我鬆一口氣，呢個時候，有同事問：「咦，你今日冇化妝嘅？」
「哦，今朝瞓過龍。」我只好咁答。
答完之後，我先開始擔心。
我冇死，的確係好事，但點解我喺鏡裡面會見唔到自己呢？
我只係一個普通OL，我嘅人生目標就係返工結婚生仔，平凡而幸福地生活落去。
但係，一旦呢件事俾人知道，所有人都會當我係怪物。
就算我唔會被人捉去研究，我都會被人指指點點，老闆都會怕麻煩，好可能會炒埋我。
總之，呢件事一定唔可以俾人知。
之後嘅日子，我過得好狼狽。
我發現，我唔係冇倒影嘅，比如水裡面，或者係一啲有少少反光嘅表面，我都可以見到自己，但清晰嘅鏡面就係唔得。
我喺公司去廁所，都要小心翼翼，趁冇人嗰陣先去。
有好幾次，我洗緊手，有人行入嚟，差啲見到鏡裡面冇我嘅倒影，嚇到我落荒而逃，好彩佢哋冇留意到。
驚險咗幾次，依加我喺出面去完廁所，都唔敢喺洗手台洗手。
出街嗰陣，見到有鏡嘅地方，更加會遠遠避開。
日復一日，我愈嚟愈恐懼，愈嚟愈憔悴。
我成日發惡夢，夢見呢件事俾人發現，所有人都當我係怪物。
連我一個人喺屋企嗰陣，我都唔敢照鏡，我已經遮住晒所有鏡，因為一望到冇倒影嘅鏡，就會提醒我，我係一個怪物。
時間耐咗，阿邦都發現我有唔妥，有一晚出街食飯，佢問我：「BB，呢排做嘢係咪好大壓力啊？」
「嗯嗯，有啲啦。」我隨口答，心裡面計算緊，呢間餐廳行出去，路上會唔會有鏡，我要點樣先可以避開。
阿邦好溫柔咁講：「唔好畀咁大壓力自己，我哋就嚟結婚啦，不如下個禮拜去揀吓酒店、揀吓婚紗？」
擺酒、婚紗、新娘，會有人幫我化妝，我會成為大家嘅焦點……我嘅秘密一定會被發現！
「唔得！」我下意識大叫。
阿邦呆咗：「你唔想嫁畀我？」
「唔係你嘅問題，我唔想擺酒，或者我哋旅行結婚，但係……」我語無倫次，一時半刻，我根本諗唔到一個完善嘅說法。
下集：https://bit.ly/2EXNSh8
突然患上人格分裂：https://goo.gl/QQsRU1
阿媽喺十八層地獄：https://goo.gl/KqgG8F
#短故 #短篇 #小說 #陳美濤 #廣東話 #粵語 #tomatochan #塊鏡照我唔到
Search